(Das Strandbad in Klagenfurt in einer Spätsommernacht 2016, menschenleer bis auf, am Ende des Steges, zwei ehemalige Beachvolleyball-Nachwuchsspieler in schwarzen Hosen und schwarzen Jacken mit der Aufschrift "Security". Während der eine Kieselsteine ins Wasser wirft, spielt der andere einfache Akkorde auf einer abgenutzten Gitarre. Nach längerem Schweigen:)
ZWEI: Wo hostn her Gitaa? Gekaft?
EINS: Gschenkt kriagt. Gerold hot gekaft neie, hot er mir gschenkt olte. Vielleicht moch ma Bend. Gerold, Franzi und i.
ZWEI: A, Franzi.
EINS: So Pop, waßt, owa deitsch. Dialekt. So wia Wiana, Fendrich, waßt eh. I schon iwasetzt Liad von Cobain. Huach. (Singt zu wenigen Akkorden:) Diandle, mei Diandle, liag mi nit on, / wo host gschlofn die letzte Nocht? / Im Wold, jo im Wold, / wo ka Sunne nia scheint, / i hob gezittat die gonze Nocht. // Diandle, mein Diandle, und wo wüllst jetz hin? / Gspiast den Wind, da Wind waht so kolt. / In Wold, jo in Wold, / wo ka Sunne nia scheint, / i wea zittan die gonze Nocht. // Da Vota hot Gleis gebaut fia ÖBB, / er woa stoak, er woa wia a Viech. / Sei Kopf is noch gsteckt untan Triebwogn drin, / da Rest woa fia imma dahin. // Diandle, mein Diandle, liag mi nit on, / wo host gschlofn die letzte Nocht? / Im Wold, jo im Wold, / wo ka Sunne nia scheint, / i hob gezittat die gonze Nocht. (Schlussakkord. Kurze Pause.)
ZWEI: Guat.
EINS: Wohl?
ZWEI: Wohl wohl, guat. Grausig holt. Owa guat.
(Pause)
ZWEI: Sog ... Mit den Diandlen ... Manst du do die Joëlle?
EINS: Wieso die Joëlle?
ZWEI: Is nit Vota Eisenbohna gwesn von da Joëlle?
EINS: Und?
ZWEI: No jo ... I gedocht ... Irgendwonn amol host du gsogt, du tatest gean die Joëlle –
EINS: Spinnst? Liad von Cobain! I iwasetzt. Fia Bend. Gerold Sologitaa, i Ritmusgitaa, Franzi Schlogzeig. Orgl tat ma noch brauchn. Mogst nit du?
ZWEI (schüttelt den Kopf): Konn nit Orgl.
EINS: Bossgitaa?
ZWEI: Eher. (Vorhang)
Material: "Where Did You Sleep Last Night" (Trad., u. a. Leadbelly 1944, Kurt Cobain 1994)
(Antonio Fian, 29.8.2016)